ԱՌԱՋՆՈՐԴ ՍՐԲԱԶԱՆԻՆ ՊԱՇՏՕՆԱԿԱՆ ԱՅՑԵԼՈՒԹԻՒՆԸ ՅՈՒՆԱՍՏԱՆԻ ՀԱՆՐԱՊԵՏՈՒԹԵԱՆ ՆԱԽԱԱՀԻՆ

ԱՌԱՋՆՈՐԴ ՍՐԲԱԶԱՆԻՆ ՊԱՇՏՕՆԱԿԱՆ ԱՅՑԵԼՈՒԹԻՒՆԸ ՅՈՒՆԱՍՏԱՆԻ ՀԱՆՐԱՊԵՏՈՒԹԵԱՆ ՆԱԽԱԱՀԻՆ
Հինգշաբթի, 15 Մարտ 2018-ի կէսօրուան ժամը 12.00-ին Յունաստանի Հայոց Թեմի Առաջնորդ՝ Գերաշնորհ Տ. Գեղամ Ս. Արք. Խաչերեան պաշտօնական անդրանիկ այցելութիւնը տուաւ Յունաստանի Հանրապետութեան նախագահ՝ Պրն. Բրոգոբիս Բաւլոբուլոսին ՝ նախագահական ապարանքի գրասենեակէն ներս։ 
Առաջանոդ Սրբազանին կ'ընկերանային Ազգային Վարչութեան ատենահետ Պրն. Պօղոս Չոլաքեան եւ ատենադպիր Պրն. Թագւոր Յովակիմեան։ 
Հանդիպումին ներկայ էին Հ.Յ.Դ. Յունաստանի Կեդրոնական Կոմիտէի ներկայացուցիչ Պրն. Քէրովբէ Էքիզեան եւ Յունաստանի Հայ Դատի Յանձնախումբի ներկայացուցիչ Պրն. Սերգօ Գոյումճեան։
Ազգային Վարչութեան ատենապետ Պրն. Պօղոս Չոլաքեան առաջին հերթին Պրն. նախագահին ներկայացուց Յունաստանի Հայոց Թեմին նորընտիր Առաջնորդ Սրբազանը, ընդհանուր գիծերու մէջ ներկայացնելով Սրբազան Հօր գործունէութիւնը Յունաստանէն ներս՝ անցեալին իբրեւ Թեսաղոնիկէի հոգեւոր հովիւ եւ ուսանող Արիստոտելեան համալսարանի, ապա իբրեւ երկար տարիներու Լիբանանի Հայոց Առաջնորդ եւ ներկայիս, համաձայն Յունաստանի Հայոց Թեմին կանոնագրութեան Թեմիս Ազգային Երեսփոխանական Ժողովին կողմէ ընտրեալ Առաջնորդ։
Պրն. Նախագահը շնորհակալութիւն յայտնեց այցելութեան համար, յայտնելով որ արդէն իսկ նախօրօք բաւական չափով ծանօթ է Սրբազանին։ Անդրադառնալով Առաջնորդի հանգամանքին, եւ զուգահեռական մը գծելով նաեւ Յոյն եկեղեցւոյ մետրոպոլիտներուն ունեցած դերակատարութեան հետ՝ յատկապէս Յունաստանէն դուրս գտնուող յունական համայնքներու կեանքին մէջ մեծապէս կարեւորեց անոնց ունեցած առանցքային դերակատարութիւնը տուեալ համայնքի մը կեանքէն ներս։ Շարունակելով, անդրադարձաւ Յունաստանի հայութեան ունեցած դրական դերակատարութեան, ըսելով որ ինք ոչ միայն հանրապետութեան նախագահի հանգամանքով, այլ նաեւ անցեալին ալ վարած պետական բոլոր պատասխանատուութեանց ընթացքին միշտ ալ ամբողական աջակցութիւն ցուցաբերած է հայութեան հետ առնչուած բոլոր խնդիրներուն, ոչ սոսկ իբրեւ քաղաքավարական վերաբերմունք այլ իբրեւ անձնական համոզումով։
Առաջնորդ Սրբազանը առաջին հերթին Պրն. նախագահին փոխանցեց Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա. Վեհափառ Հայրեպետի ջերմ ողջոյնները, եւ ապա շնորհակալութիւն յայտնեց ընդունելութեան համար, հաստատելով որ իսկապէս Պրն. նախագահը նախքան այս պաշտօնական այցելութիւնը զանազան առիթներով զգալի դարձուցած էր իր ծանօթ ըլլալը իրեն իբրեւ նոր Առաջնորդ, ինչ որ ցոյց կուտար Պրն. նախագահին ուշադիր վերաբերմունքը նաեւ Յունահայոց նկատմամբ։ 
Առաջնորդ Սրբազանը հիմնական գիծերու մէջ նկարագրեց աշխարհականներու լայն եւ գործօն մասնակցութեամբ Հայ Եկեղեցւոյ վարչական ժողովրդավար դրութիւնը, ինչ որ եզակի երեւոյթ է առաքելական ծագում ունեցող հին եկեղեցիներու համար։ Ազգային Վարչութեան Ատենապետը յաւելեալ մանրամասնութիւններ տուաւ Յունաստանի Հայոց Թեմին կանոնագրութեամբ սահմանուած գործադիր իշխանութեան՝ Ազգային Վարչութեան կառոյցներուն գործունէութեան , որ կը ներառէ ամբողջ Յունաստանի տարածքին գտնուող հայաբնակ քաղաքները։
Սոյն այցելութեան առթիւ, Ազգային Վարչութեան ատենապետը Պրն. նախագահին փոխանցեց Յունաստանի մէջ Հայաստանի Հանրապետութեամբ դեսպան Պրն. Ֆատեյ Չարչօղլեանի բարեմաղթութիւնները, նորին վսեմութեան ազնիւ ուշադրութեան յանձնելով որ ակնկառոյց ուրախութեամբ կը սպասեն զինք Հայաստան կատարելիք պաշօնական այցելութեան։
Այցելութեան աւարտին, Առաջնորդ Սրբազանը իր գոհունակութիւնը եւ ուրախութիւնը յայտնեց, որ Պրն. Նախագահին անձնաւորութեան պէս բանիմաց, ակադեմական գիտնական եւ փորձագէտ քաղաքական պետական այրմը այսօր կը գլխաւորէ Յունաստանի Հանրապետութիւնը եւ աղօթելով որ Տէր Աստուած պահէ պահպանէ Յունաստան օրհնեալ երկիրը եւ մանաւանդ վերջերս Թուրքիոյ կողմէ գերեվարուած երկու սպաներուն շուտափոյթ եւ ապահով վերադարձ մաղթեց։
Պրն. նախագահը մեծապէս շնորհակալ եղաւ այս գերջին բարեմաղթութեանց համար։
ԴԻՒԱՆ ՅՈՒՆԱՍՏԱՆԻ ՀԱՅՈՑ ԱԶԳԱՅԻՆ ԱՌԱՋՆՈՐԴԱՐԱՆԻ

теплоизоляция краснодар